Komputilo/Interreto 

1 - 10 | 21 - 30 (52)
 
 

Plu kreskas la vikipedio en Esperanto

2011-01-21

Nur tri tagojn post la 10-jara jubileo de la entuta vikipedio-projekto (en la 15-a de januaro) la Esperanto-vikipedio atingis 140.000 artikolojn, vespere de la 18-a. Nuntempe "nia" versio de la vaste konata internacia projekto enhavas pli ol 30 milionojn da vortoj - simile granda kiel multvolumaj paperaj enciklopedioj.

Ĝi aktuale okupas laŭ la nombro de artikoloj lokon 26 kompare kun alilingvaj versioj de la vikipedio. Antaŭ la tempo de interreto kaj rapida internacia kunlaboro oni simple ne povis revi en Esperantujo pri tia projekto - tiel granda kaj kreskanta en tiel mallonga tempo: la Esperanto-Vikipedio.

Pli ol 300.000 rigardoj tage

Ĉiuhore estas proksimume 15.000 rigardoj al paĝo de la Esperanto-vikipedio; per tio Esperanto okupas lokon 38 en komparo kun aliaj lingvoj. Eble duono de la vizitoj estas de robotoj, sed la alia duono supozeble estas de homoj. Oni do relative ofte konsultas la vikipedion.

Libera projekto por krei enciklopedion

Kelkfoje oni legas kritikon pri vikipedio - ke ĝi estas erara, nefidinda aŭ nekompleta. Eble la oficiala kromnomo de ĝi konfuzas legantojn: Tekstas "libera enciklopedio", sed fakte ankoraŭ temas pri "libera projekto por krei enciklopedion". Iusence ĉe vikipedio oni rajtas enrigardi la slipojn de la redaktantaro, jam longe antaŭ la finpretigo. Skribi, ke en vikipedio io estas malĝusta aŭ mankhava estas agi simile kiel homo, kiu kritikas, ke konstruata domo havas nek fenestrojn nek tegmenton. Dum la vikipedio estas ankoraŭ redaktata, oni rajtas jam uzi ĝin - sed je propra risko. Oni eble povas provi ekloĝi en konstruata domo - sed bv. ne plendi, ke ankoraŭ envenas vento kaj pluvo. La "Interreto 2.0" funkcias laŭ aliaj manieroj ol "Interreto 1.0" kaj la papera libromondo; indas konsideri tion.

WikiTrans: Aŭtomata vikipedio-traduko kun pli ol tri milionoj da artikoloj

Multe pli granda ol la Esperanto-vikipedio (kaj laŭ enhavaj kriterioj supozeble pli bona) estas la aŭtomata traduko de la angla vikipedio en Esperanton, kiun preparis la dana entrepreno GrammarSoft gvidata de Eckhard Bick. Ĉe Wikitrans eblas serĉi en pli ol tri milionoj da artikoloj maŝine tradukitaj - kun lingva nivelo certe ne jam perfekta, sed kun kutime bone komprenebla enhavo.

Ĉu vi ŝatus kunlabori en vikipedio?

La artikoloj de WikiTrans taŭgas ankaŭ kiel bazo por kreado de artikoloj en la aktuala vikipedio, se oni volas ĉerpi almenaŭ parton de la enhavo el la angla vikipedio. Se vi volas kunlabori en la granda libera Esperanto-enciklopedio - jen eble bona komenco. Pliaj informoj troviĝas sur la bonveniga paĝo.

Simpligi la kunlaboradon

Krome mi ŝatas subteni la ideon, ke oni povos iam krei artikolojn en vikipedio tiom facile, kiel oni tradukas frazojn en la multlingva frazaro Tatoeba, kun elektebla originala versio supre kaj traduk-fenestro sube. (Verŝajne necesus lokigi tian tradukejon en alia loko ol vikipedio; oni poste transportos la pretan artikolon al vikipedio mem.) Ni eble sukcesos postkuri la aliajn lingvojn, se ni tradukadas kun helpo de aŭtomato, dum en ili oni verkadas - sed verŝajne kun la malgranda nuna Esperanto-parolantaro ne, se ni insistas pri memverkado. Kiu estas malgranda, tiu devas elpensi trukojn por tamen sukcesi konkurenci kun la aliaj. Kaj ni ja sukcesos krei ion pli ampleksan, se iam ni ankoraŭ pli tradukos kaj transprenos el multaj lingvoj kaj kulturoj.

Eble la principo "KISS" estas bona, "Keep It Simple and Stupid" (tenu ĝin simpla kaj stulta). Aktuale vikipedio estas komplika, dum Tatoeba sekvas la "KISS"-principon. Sekve vikipedio plu kreskis per 10 mil artikoloj en ĉ. 8 monatoj, dum Tatoeba eksaltis de mil al 60 mil frazoj ene de 6 monatoj (ankoraŭ sen helpo de tradukaŭtomato cetere).

Kiel festi la 150.000-an artikolon?

La venonta mejloŝtono de la artikolnombro estos 150.000. Dum la pasinta jaro oni bezonis 230 tagojn por krei dekmilon da novaj artikoloj - se daŭros tiel, la jubileo estos atendebla ĉirkaŭ la 5-a de septembro 2011. Almenaŭ tiuj, kiuj ŝatas vikipedion, prefere jam nun pripensu kiel krei informkampanjon lige al tio - ene de Esperantujo por allogi pli da kunlaborantoj kaj ekstere por atentigi pri Esperanto kaj ties eblecoj.

Lu Wunsch-Rolshoven, EsperantoLand

(La artikolo samtempe aperas ĉe Libera Folio, kie eblas komenti.)

 

Armena Esperantista Unuiĝo en la reto

2010-12-04

La Armena Esperantista Unuiĝo prezentiĝas sur siaj novaj interretaj paĝoj. En Esperanto kaj en la armena oni povas vidi bildojn kaj legi informojn pri la laboro de la asocio.

De la 29-a de junio ĝis la 5-a de julio 2011 la unuiĝo planas sian 1-an Internacian Esperanto-Semajnon en la ĉefurbo Erewan kaj en Tsakhkadzor, Armenio.

[Landa Agado]

 

Informteknika entrepreno varbas per Esperanto

2010-11-29

auf deutsch

La entrepreno BT Global Services en varbofilmeto uzis ankaŭ Esperanton; BTGS estas parto de la privatigita brita telefonentrepreno BT kaj havas tutmonde ĉ. 35.000 dungitojn.

En la filmeto kunlaborantoj priskribas la laboron de la entrepreno; en Esperanto oni aŭdas: "Ni kunigas komunikaĵajn kaj retajn informteknologiajn servojn sekure kaj efike."

La du minutojn longa varbofilmeto "Who we are, what we do" (Kiu ni estas, kion ni faras) estas videbla ĉe Youtube; la du Esperanto-partoj troviĝas en la unua triono kaj ĉe la fino; tie aŭdiĝas: "La diferenco estas mi." Aldone al Esperanto aliaj kunlaborantoj parolas en la franca, persa, nederlanda, ĉina, portugala, hindia kaj germana.

[esper=brit]

 

Retgazeto "Barelo" pri Litovio

2010-02-24

En oktobro 2008 Antanas GRINCEVICIUS, esperantisto el la litovia ĉefurbo Vilnius, iniciatis retan taglibron (tiel nomatan "blogon") pri interesaj kaj aktualaj eventoj en Litovio. Esperanto-temoj tie ankaŭ ne estas fremdaj. Efektive, tiu taglibro estas altnivela retgazeto pri Litovio kun la titolo "Barelo".

Historio, kulturo, politiko, ...

“Barelo” estas imitinda ekzemplo de praktika utiligo de Esperanto. Eble ĝi estas unika en la mondo - apenaŭ ekzistas io simila en aliaj landoj. La retgazeto estas profesie farita. Ĉiu artikolo estas bele kaj trafe ilustrita. En la retgazeto eblas legi interesajn kaj aktualajn artikolojn pri historio, kulturo, naturo, arto, ekologio, ekonomiko, politiko, energetiko, festoj, folkloro, fotografio, lingvo, literaturo, muziko, scienco, sporto k.s. de Litovio – entute estas 51 ŝlosilvortoj, el ili 5 estas Esperanto-rilataj. Ĉiuj artikoloj estas verkitaj de la aŭtoro en bona Esperanto. Estas bona ekvilibro de diversaj temoj. Do, la retgazeto ne estas pri Esperanto, sed simile kiel la revuoj "Monato" au "Kontakto" pri diversaj temoj en Esperanto.

84 artikoloj ĝis nun

Ekde la lanĉo de la retgazeto la 10-an de oktobro 2008 ĝis hodiaŭ (la 18-an de februaro 2010) en ĝi estas publikigitaj 84 artikoloj, el ili 12 estas ligitaj kun Esperanto. La retgazeto havas ligojn al aliaj retejoj pri fotoj, tradukado, lingvaj problemoj, diversaj TTT-ejoj, esperantistoj, literaturo, tekstoj, gazetaro, E-radioj k.s.

Ĉu vi ŝatos ĉerpi el la "barelo"?

La retgazeto meritas multe pli da atento ol ĝi havis ĝis nun, ĉar pro la modesteco de la aŭtoro (retpoŝte: grinanta ĈE gmail.com) ĝi ne estis sufiĉe reklamita.

Slogano

La slogano de la retgazeto estas: "Por eldiri la opinion ne serĉu barelon sur bazara placo...".

[Povilas JEGOROVAS, redakcio]

 

120.000 artikoloj en la Esperanto-vikipedio

2009-10-16

En la 15-a de oktobro la Esperanto-vikipedio atingis 120.000 artikolojn. Nia vikipedio nun tenas laŭ la nombro de artikoloj lokon 21 inter la diverslingvaj versioj; la volapukan version oni preterpasis antaŭ kelkaj semajnoj, en la 22-a de septembro. La 120.000-a artikolo temas pri São Bento do Trairí, eta urbo en norda Brazilo.

Ĉiutage ĉ. 160.000 vizitoj de homoj

La Esperanto-vikipedio ricevas tage ĉ. 160.000 vizitojn de homoj (do sen robotoj). Per tio la Esperanto-vikipedio en aŭgusto tenis lokon 33 - iom post la greka kaj slovaka, iom antaŭ la litova kaj serba versioj de vikipedio.

Graveco de la vikipedio

La Esperanto-vikipedio havas pluroblan utilon por la Esperanto-komunumo. Unue ĝi servas kiel leksikono - fakte la unua ĝenerala leksikono en la ĝisnuna 122-jara historio de Esperantujo. Due ĝi per tio subtenas ankaŭ la terminologian diskutadon kaj laboron. Trie nia vikipedio tre klare montras al la ekstera mondo, ke Esperanto vivas ĉiutage kaj daŭre estas uzata. La lingvo Esperanto, antaŭ 122 jaroj la plej malgranda lingvo de la mondo, intertempe havas firman lokon inter la 50 plej gravaj lingvoj. Tio videblas krom per vikipedio ankaŭ per pluraj aliaj statistikoj kaj per la uzado en multlingvaj retejoj.

"Unu kontribuo por vikipedio ĉiumonate"

Por subteni la pluan konstruadon de la vikipedio mi alvokas ĉiun lingve spertan Esperanto-parolanton kontribui al vikipedio ĉiumonate almenaŭ per eta aldono. Egalas, ĉu tio estas korekteto de artikolo aŭ redaktado, tradukado el alia vikipedio aŭ verkado de komplete nova artikolo. Ĉiu kontribuo helpas daŭrigi la gravan taskon - supozeble temas pri la plej granda verkada tasko en la historio de Esperantujo.

Lu Wunsch-Rolshoven, EsperantoLand

 

"Fajrovulpo" (Firefox) en Esperanto

2008-11-20

La tre disvastigita kaj senkosta retumilo "Fajrovulpo" (Firefox) ekzistas ekde mallonge ankaŭ en Esperanto-versio. Ekde versio 3.1 (nuntempe ankoraŭ beta-versio) ekzistas preta Esperanto-eldono por elŝuti; oni povas elekti inter versioj por Vindozo, Linukso kaj Mac.

Aldona programo por Fajrovulpo 3.0

Por la jam stabilaj versioj de Fajrovulpo 3 (3.0 - 3.0.3) oni povas elŝutigi aldonan programon.

[Libera Folio]

 

100.000 artikoloj en la Esperanto-vikipedio

2008-06-11

Proksimume en la 16a de junio la Esperanto-vikipedio havos 100.000 artikolojn. La internacia lingvo Esperanto per tio antaŭvideble estos la 20a lingvo, kiu atingos tiun grandecon.

Interŝanĝo de la kulturoj de la mondo

Ĉiutage la Esperanto-Vikipedio kreskas per mezume 40 artikoloj kaj kelkaj cent aldonoj kaj redaktoj de jam ekzistantaj artikoloj. La kunlaborantoj venas el pluraj dekoj da landoj kaj tial povas enmeti la scion el multaj diversaj kulturoj de la mondo en la Esperanto-vikipedion.

Proksimume 100 librovolumoj de po 300 paĝoj

Entute la Esperanto-versio de la interreta enciklopedio entenas ĉ. 19 milionojn da vortoj, mezume estas do 190 vortoj por unu artikolo aŭ 20 linioj da teksto. Metante 600 vortojn sur unu paĝon ebla presita versio havus 30.000 paĝojn aŭ 100 volumojn de po 300 paĝoj.

Kelkaj artikoloj entenas nur frazon. Aliaj, kiel la artikoloj pri "delfenoj" aŭ pri la "Berlina muro" entenas detalajn prezentojn pri difinita temo.

Esperanto - la "lingva rang-altiĝanto de la 20a jarcento"

Per la rango 20 atingita en la vikipedio la lingvo Esperanto konfirmas sian pozicion inter la internacie plej multe uzata lingvoj. Esperanto estas unu el la 9 lingvoj, en kiuj la Ĉina Interreta Informa Centro publikigas novaĵojn. La serĉmaŝino Google ofertas Esperanton kiel unu el 42 serĉlingvoj.

En la censo en Litovio en 2001 Esperanto atingis rangon 16 inter la fremdlingvoj, kiujn regas la loĝantaro. En samjara censo en Hungario Esperanto atingis la 18an lokon.

Kvankam la unua lernolibro de Esperanto estis eldonita en 1887, do antaŭ nur 121 jaroj, la lingvo estas nun parolata de homoj en pli ol cent landoj de la mondo.

Ĝi hodiaŭ okupas unu el la antaŭaj lokoj kiel internacie uzata lingvo kaj oni povas nomi ĝin "lingva rang-altiĝanto de la 20a jarcento": Neniu alia lingvo povis plibonigi sian pozicion inter la ĉ. 6.000 lingvoj de la mondo ene de nur unu jarcento ekde la lasta loko al unu el la antaŭaj 50.

--

La stato en ĵaŭdo, 12a de junio, matene, estis 99.756 artikoloj. Ĉiutage aldoniĝas 40 ĝis 50 artikoloj; atendeblas do, ke la marko de 100.000 artikoloj estos atingita ĉirkaŭ la 16a de junio.

 

Esperanto-varbado de Google Mail

2007-12-13

En duminuta filmo de Gmail pri la filtrado de nedezirata varbado la parolanto fine donas konsiletojn, kiel uzi la gajnitan tempon - ekzemple lerni Esperanton. La montrata libro "Learn Esperanto fast" cetere estas speciale produktita por la filmeto - la titolo ne ekzistas.

La anglalingva filmeto "Spam, time, and you: An educational video from Gmail" videblas ĉe Google kaj YooTube.

Esperanto ĉe Google

Jam de kelkaj jaroj Google uzas Esperanton en sia serĉmaŝino; tie oni povas elekti Esperanton kiel lingvon de la uzanto, same kiel ĉe la Google-grupoj. Lastatempe aldoniĝis Esperanto kiel dezirata lingvo de la serĉataj paĝoj. Google tion faras verŝajne malpli por intence subteni Esperanton, sed sekve de la kreskanta nombro de esperantlingvaj retpaĝoj, ekzemple en la Vikipedio, kie intertempe legeblas pli ol 90.000 artikoloj en Esperanto.

[nejkajfleja]

 

Kulturo el Brazilo

2007-09-06

Ne ĉiutage oni aŭdas novaĵojn el Brazilo. Se vi volas konatiĝi kun kelkaj pecoj el la brazila literaturo kaj iom ekscii pri la Esperanto-vivo en Brazilo, eble vagu tra la retpaĝoj de "Kultura Kooperativo de Esperantistoj" el Rio de Ĵaneiro.

Vi trovas tie dudekon da prozaj tekstoj, sesdekon da poeziaĵoj, kelkajn tekstojn por komencantoj kaj ĉ. kvindek kantojn de Sylla Chaves, Flávio Fonseca, Merlin, Kajto k.a. por elŝuti. Troveblas ankaŭ tekstoj kaj kantoj por infanoj. Krome ne mankas ĝeneralaj informoj pri la kultura agado de la kooperativo kaj certe videblas ankaŭ abundo da fotoj el la brazila Esperanto-vivo.

 

Perkomputila tradukhelpilo en Esperanto

2005-06-29

La senpaga tradukhelpilo-programo OmegaT jam atingeblas ankaŭ en Esperanto. Ne nur la surfaco de la programo estas tradukita al la internacia lingvo sed ankaŭ ĝia manlibro kaj helpo.

[tradukado]

 

© EsperantoLand