Muziko 

1 - 10 | 21 - 23 (23)
 
 

Profesia, altkvalita KD pri vivaj koncertoj

2004-07-25

"Vivaj Koncertoj" estas la titolo de la kompaktdisko, kiu prezentas vivajn koncertojn de rusiaj Esperanto-artistoj.

11 horoj da koncerto

La disko enhavas 11 horojn da materialo. Temas pri altkvalitaj mp3-dosieroj (128 kbps), kiuj estas registritaj dum diversaj rusiaj Esperanto-aranĝoj.

Altkvalita ĉirkaŭaĵo

La uzanton de la KD helpas grafika menu-sistemo, kiu enhavas inter alie la fotojn de la artistoj.

[e-rus-info]

 

Fama Esperanto-grupo koncertos por junuloj

2004-07-01

Dum la ĉi-jara 60-a Internacia Junulara Kongreso (Esperanto-renkontigho IJK) tre fama ensemblo koncertos por la preskaŭ 400 partoprenantoj.

La nomoj de Ĵomart Amzejev kaj Nataŝa Gerlah promesas jam nun neforgeseblan koncerton al la ĉeestontoj. Plej verŝajne la duopo restos en Rusio eĉ dum la tuta renkontiĝo, kiu daŭros de la 10a ĝis la 17a de julio en Kovrov (regiono de Vladimir), kelkcent kilometrojn oriente de Moskvo.

[esperanto-rus-info]

 

"Diverslingve" kantas diverslingve

2004-06-30

La konata sveda muzikgrupo "Diverslingve" kantas en 10 lingvoj. La ĉefa lingvo de la grupo estas Esperanto.

Sukcesaj koncertoj

"Diverslingve" prezentis kaj plu prezentas sukcesajn koncertojn en pluraj lingvoj dum Esperanto-aranĝoj kaj ankaŭ ekster Esperantio.

Profesia informejo

La teamo havas kvarlingvan, profesian hejmpaĝon, kiu ofertas informojn, bildojn kaj muzikon de la grupo.

[nun]

 

Etnofestivalo invitis ankaŭ Esperanto-grupon

2004-06-23

La festivalo Vizaĝoj en Finnlando estas la plej granda etnomuzika festivalo en Finnlando. La organizantoj ĉi-jare vokis ankaŭ Esperanto-muzikgrupon, nome Dolchamar.

Esperanto dum la ĉefa tago

La grupo Dolchamar povas prezenti sin dum la ĉefa tago de la tuta aranĝo, la 31-an de julio, kiam multegaj homoj venos al Karjas/Billnas por ĝui bonan etno-muzikan etoson.

[tejo-aktuale]

 

Elektu vian Esperanto-artiston el la reto

2004-06-22

Por plifaciligi la kontaktojn inter Esperanto-artistoj kaj organizantoj de aranĝoj la Tutmonda Esperantista Junulara Asocio (TEJO) kune kun Esperanta muzikeldonejo fondis datenbazon pri aktuala, viva Esperanto-kulturo.

Kalkulu ĉion antaŭ la ekkontakto!

En la Artista Datenbazo troviĝas vasta informaro pri la artisto aŭ artista grupo, ekde la salajro aŭ honorario ĝis la atendataj gastigaj kondiĉoj, ekde mallonga historio de la grupo ĝis ĝia hodiaŭo. Organizantoj de Esperanto-aranĝoj pere de la datenbazo povas preskaŭ ĉion antaŭvidi pri artistoj dum la aranĝo.

 

Infana elekto: Esperanto - "la plej bela lingvo, kiu ekzistas"

2004-05-01

La unuan lokon el diverslingvaj kantoj okupis Esperanta kanto laŭ la voĉdono de infanoj de fundamentaj lernejoj de la franclingva komunumo en Belgio.

Projekto por ekkoni lingvojn

La ministro por la fundamentaj lernejoj de la Franclingva Komunumo de Belgio (S-ro Jean-Marc Nollet) kunmetigis kompletan dosieron kadre de la kampanjo "Atentigo pri lingvoj" ("Eveil aux langues") por diskonigi diversajn lingvojn inter la junaj lernantoj de la franclingvaj lernejoj. La dosieron apogas lumdisko kun 16 belaj kantoj en diversaj lingvoj. La dosiero kaj la disko estis vaste disdonitaj.

Esperanto-kanto

En la lumdisko inter 16 kantoj aperis ankaŭ Esperantlingva kanto, kies titolo estas "La bona formiko". Ĝin surdiskigis Nikolin' en la internacia lingvo.

Esperanto en la unua loko

En suplemento por infanoj de la famkonata belga franclingva gazeto "Le Soir" (Le Soir Junior n-ro 132) aperis reagoj rilate al la kampajno "Atentigo pri lingvoj". La infanoj devis taksi la plej ŝatatajn kantojn kaj klarigi siajn elektojn. La plej multajn elektojn ricevis la Esperanta kanto de Nikolin'. "Ĉar ĝi estas amuza", "ĉar ĝi estas la plej bela lingvo, kiu ekzistas", klarigis la infanoj.

[landa-agado]

 

Monda Infankoruso en Esperanto

2004-04-25

La nova koruso "Monda Infankoruso", kiu situas en Vasteras, Svedio, kantos dum sia prezento la 8-an de majo, en la Tago de Infanoj, ankaŭ en Esperanto.

"Kanto en Esperanto estas bona eniro al aliaj lingvoj"

La gvidanto de la koruso decidis prezenti la kanton "Iomete da suno". La koruso ekde ĝia fondiĝo kantis nur svedlingve - nun okazos unuafoje prezento en alia lingvo, nome en Esperanto. La gvidanto de la koruso opinias, ke kanto en Esperanto estas bona aliro al aliaj lingvoj.

[nun]

 

Radio-Esperanto dum 24 horoj

2004-04-23

En la interreto funkcias esperantlingva radiostacio "Radio Esperanto", kiu elsendas sian programon 24 horojn ĉiutage.

La programo de la stacio konsistas preskaŭ komplete el Esperanto-muzikaĵoj. Por komencantoj la stacio estas bona vojo por konatiĝi kun la esperantlingva muzika kulturo.

La stacio dissendas sian programon en la formatoj ogg kaj mp3 laŭ elekto de la vizitanto - la ofertata muziko estas malsama.

 

Esperanto-muzikgrupo "Kajto" premiita

2004-04-22

Ĉi-jare la muzika grupo "Kajto" ricevis la valoran FAME-premion, kiun eĉ pligrandigis kontribuo de la ŝparkaso "Kreissparkasse Ostalb". Jen la unua fojo en la 9jara historio de la premio de FAME-fondaĵo, ke premiiĝis muzikgrupo.

Trobadoroj el Frislando

La anoj de la muzika grupo Kajto venas el la regiono Frislando en norda Nederlando. Ili ludas kutime popoldevenajn muzikaĵojn.

Altranga kultura premio

La estraro de la germana FAME-fondaĵo ĉiujare aljuĝas Esperanto-kulturan premion. Inter la premiitoj estas jam multaj famaj esperantistoj.

Subteno de ne-esperantistoj

La ĉi jaran Esperanto-kulturan premion subtenas ankaŭ la ne-esperantista organizo "Kreissparkasse Ostalb", tiel ke la monsumo de la premio estas nun 5000 eŭroj.

Ceremonio kun publika intereso

La honorado por la premiitoj kaj la solena premitransdono okazos en oktobro en la urba biblioteko de la sudgermana urbeto Aalen kun ĉeesto de la urbestro, estrarano de la subtenanta banko, invititaj gastoj kaj la loka gazetaro.

 

Kristnasko pasis - kristnasko venos!

2004-02-18

Por dece prepariĝi al la venonta kristnasko eblas jam nun aŭskulti la entute 25 kristnaskajn kantojn de la nova lumdisko, kiun preparis la 7-kapa nederlanda kantgrupo "Akordo". La kantoj prezentitaj sur niaj libropaĝoj estas kolektitaj el deko da landoj, interalie Venezuelo, Ukrainio, Ĉeĥio, Britio, Usono, Ukrainio, Nederlando kaj Germanio. Eblas elŝutigi senkoste la sondosierojn de kvar el la kantoj de la lumdisko "Kristnaska kordo".

 

© EsperantoLand